Ano ang naiisip mo kapag narinig mo ang salitang relihiyon?
Marahil ay naguguniguni mo ang isang gusali ng simbahan. Marahil naiisip mo ang isang krus. Marahil naiisip mo ang mga estatwa o katedral o mga altar o mga upuan. Marahil ang kaisipan ng relihiyon ay nagdudulot sa iyo ng kaaliwan, o nanaisin mong tumakbo sa kabilang direksyon.
Narito ang sinasabi ng Biblia kung ano ang tunay na relihiyon:
“Ang pagiging relihiyoso na dalisay at walang dungis sa harap ng ating Diyos at Ama ay ang pagtulong sa mga ulila at sa mga biyuda sa kanilang kahirapan, at pag-iingat sa sarili upang huwag mahawa sa kasamaan ng mundong ito.”
Santiago 1: 27 RTPV05
Ang tunay na relihiyon sa mata ng Diyos ay ang pangangalaga sa mga nasasaktan at pinakakawawa, gayundin ang pagpaparangal sa Kanya ng iyong buhay.
Magagawa mo ito sa napakaraming paraan. Narito ang ilan lamang sa mga ito:
Sa pisikal: Maaari kang maghatid ng mga pinamili sa isang kapitbahay, turuan ang isang bata na magbasa o makipaglaro ng bola, anyayahan ang isang bagong kaibigan sa hapunan, o kumupkop o mag-ampon ng isang bata (o suportahan ang mga kumukupkop o umampon ng mga bata).
Sa pananalapi: Maaari kang magbigay nang bukas-palad upang mapagaan ang pinansiyal na pasanin ng mga walang gaanong suporta. Maaari kang maghanap ng lokal na simbahan o kawanggawa upang mag-abuloy, o mag-alok ng tulong sa mga bayarin sa kuryente at tubig, mga extracurricular activity ng mga bata, o bayaran ang utang.
Emosyonal: Maaari kang maging mga kamay at paa ng Diyos—sa pamamagitan ng pagpapakita, pakikinig, pagpapatibay-loob, at simpleng presensya.
Sa espirituwal: Maaari kang mag-alok ng espirituwal na suporta o panalangin sa mga maaaring gumamit ng gabay, patnubay, o maging mga paalala sa kung ano ang alam na nilang totoo.
Isinulat ni Santiago na ang tunay na relihiyon sa paningin ng Diyos ay may kasama ring pag-iingat sa iyong sarili na “hindi madungisan ng sanlibutan.” Paano mo nagagawa iyan? Maaari kang magtiwala sa puso ng Diyos. Maaari kang sumuko sa Kanyang mga paraan. Maaari mong ituon ang iyong mga mata sa Kanya.
Ang pagiging “relihiyoso” ay hindi tungkol sa isang panlabas na nakikita o isang espirituwal na talaan, kundi ang pagmamahal sa Diyos at paglilingkod sa iba—na sa huli, ay gagawin tayong mas katulad Niya.
