.jpg)
Ano ang iyong pinakamahalagang pag-aari? Maaaring ito ang pinakamahalagang bagay na pag-aari mo, tulad ng bahay na pinagpaguran mo ng buong buhay para mabili mo. Ngunit maaari rin itong isang larawan mula sa isang espesyal na oras na ginugol mo kasama ang taong mahal mo. O maaaring ito ay isang makabuluhang regalo mula sa isang kaibigan.
Ang halaga na itinatakda natin sa ating "mga bagay" ay nababalot sa ating mga damdamin. Kung paano natin pinipiling gamitin ang mga bagay na itinatangi natin ay nagpapakita ng ating tunay na mga priyoridad.
Ang kamatayan ni Jesus sa krus ay isa sa mga pinakadakilang halimbawa ng pagkabukas-palad ng Diyos. Sa kabila ng pagkaalam na hinding-hindi natin Siya masusuklian, hindi nag-atubili ang Diyos na ibigay ang Kanyang pinakadakilang kayamanan—ang Kanyang kaisa-isang Anak—para sa atin. At sa pamamagitan ng pagsasakripisyong iyon, ipinakita Niya kung ano ang anyo ng pagkabukas-palad: kusang-loob na ialay ang kung ano ang mayroon tayo upang ang ibang tao ay umunlad, kahit na ang gawaing ito ay nagdudulot sa atin ng sakit.
Hindi mo kailangang basta magbigay ng pera para maging bukas-palad. Ang pamumuhay na bukas-palad ay simpleng pagkilala na kayang gawin ng Diyos ang anumang naisin Niya sa pamamagitan ng mga kaloob na ibinigay Niya sa iyo. Kapag hinayaan mong magbigay ang Diyos sa pamamagitan mo, at pinararangalan mo Siya sa iyong pagbibigay, mas mapapalapit ka nito sa Kanya. Ang pagkabukas-palad ay dumadaloy mula sa isang pusong nagpapasalamat at nagtitiwala, at kapag pinagkatiwalaan mo ang Diyos sa kung ano ang mayroon ka, nagsisimula Siyang ipagkatiwala sa iyo ang higit pa.
Ang pagsasanay sa ganitong ugali ay nagpapaalala sa iyo na hindi ikaw ang nagkokontrol, ngunit kilala mo Siya na may kontrol—at Siya ay makapagbibigay ng lahat ng iyong pangangailangan.
Kaya ano ang kailangan mong ibigay? Subukang maghanap ng isang lugar kung saan maaari kang maglagak kung ano ang mayroon ka sa anumang paraan. Magsimula sa maliit, o maging malaki. Magsimula ka lang.
